Marianaramadhani's Blog

Bapantunan

Pantun merupakan salah satu budaya banjar yang mungkin sudah dikesampingkan oleh masyarakat. hal ini terjadi karena pengaruh budaya barat dan tidak adanya kesadaran masyarakatnya terutama kaum remaja, sepertinya mereka enggan sekali untuk melestarikannya. Pantun-pantun yang tertulis di sini merupakan kumpulan pantun yang kami buat sendiri guna melestarikan pantun-pantun yang sudah mulai memudar dikalangan masyarakat Banjarmasin. Semoga pantun-pantun ini bisa menjadi sumber inspirasi bagi Anda yang ingin turut melestarikan budaya banjar.

Perang Banjar

Maandak parang di dalam lamari

Jangan diandak di bawah jendela

Perang Banjar dipimpin Pangeran Antasari

Parlawanan rakyat malawan Balanda

 

Jalan-jalan ka pasar hanyar

Jangan kada ingat manukar kasturi

Pangeran Antasari pamimpin Perang Banjar

Patut dikenang wan dihormati

 

Masakan Banjar

Bajalan-jalan ka Benua Lima

Handak manukar wadai amparan tatak

Masakan banjar masakan urang banua

Papuyu babanam wan gangan balamak

 

Mangayuh jukung sampai ka muara

Ka pasar tarapung maantar kuitan

Wadai kalalapon kadada tandingannya

Asli pawarisan Kalimantan Selatan

 

Kain Sasirangan

Manukar kain tilai di pasar hanyar

Handak diulah baju kabaya

Kain sasirangan kain urang banjar

Maulah langkar nang mamakainya

 

Anak bakantan guring di dahan

Singgah ka kapal umpat balayar

Kain sasirangan wajib dilastariakan

Supaya tarkanal sampai ke dunia luar

 

Anak warik anak bakantan

Maluncat-luncat di atas dahan

Umai bagusnya kain sasirangan

Kabanggaan urang Kalimantan Selatan

 

Adat Banjar

Rabiul Awal bulan maulid

Manabuh tarbang di Mesjid Raya

Adat banjar baayun mulud

Tataplah dijaga wan dipalihara

 

Tulak ka langgar manabuh tarbang

Bamaulidan imbah mambaca yasin

Hadrah Senoman baayun payung kambang

Asli kesenian musik khas Banjarmasin

 

Muha bangkak bakas ditampar

Obatiakan wan daun pisang

Kita lastariakan budaya banjar

Supaya jangan dicuntan urang

 

Kasihatan Sakulah wan Ramaja

Hari mandung bakilat-kilat

Anak bakantan guring di dahan

Rasa kada bagus urang malihat

Sampah di sakulahan banyak bahamburan

 

Tulak ka barabai malihat pamandangan

Kada bulik mun kada singgah di Pagat

Di sakulahan jangan buang sampah sambarangan

Supaya sakulah barasih wan sihat

 

Anak bakantan masih guring di dahan

Lalu tabangun tulak ka pasar

Wahai ramaja jagalah pargaulan

Supaya tahindar panyakit manular

 

Tulak sambahyang ka Masjid Raya

Basalawar panjang basandal gapit

Wayah ramaja sudah koler baulahraga

Hati-hati tuhanya dihurung panyakit

Tumbuhan Obat

Paring ditabang diambil batangnya

Diracik-racik diulah kuit gigi

Daun sop dijarang diminum banyunya

Tatambaan panyakit darah tinggi

 

Maandak kartas di atas lamari

Ditiup angin gugur ka bawah jandila

Daun lalambai paling dicari

Panawar gasan sakit kapala

 

Anak kucing mangulai bawang

Bagaling-galing tahantup kapalanya

Banyu tipakan dicampur gula habang

Maulah awak hangat nang manginumnya

 

Dari barabai mambawa apam

Tapi nukarnya jangan bahutang

Mun bagian pian panas dalam

Lakasi minumi wan daun alang-alang

Narkoba

Tulak ka pasar manukar lapat

Singgah satumat manukar mangga

Narkoba panyakit paling harat

Parusak jiwa wan raga

 

Panas-panas mamakan laksa

Kada nyaman mun kada baiwak haruan

Ui…buhan ganarasi panarus bangsa

Narkoba lakas dibarantas jangan dilihatakan

 

Katupat Kandangan iwaknya haruan

Jangan kada ingat sambal acannya

Wayah ini sudah tanda akhir zaman

Lantaran narkoba jadi makanan remaja

 

Basapida sampai ka Martapura

Singgah satumat manukar mangga

Jangan sampai kita mati sia-sia

Musnahakan narkoba sampai ka akarnya


DBD wan Diare

Pahit banar rasa papare

Tapi nyaman dimakan wan acan

Amun kada handak kena penyakit diare

Jangan manukar ulanjaan di pinggir jalan

 

Panas-panas gangan balamak

Nyaman banar mun haruan iwaknya

Biar Aedes aegypti maigut ka awak

Kada harapan kena mun kadada Virus Dengue-nya

 

Makan lakatan di bawah jambatan

Hati-hati diigut buaya

Basuhlah tangan sabalum makan

Waspadai panyakit nang barbahaya

 

Duduk basila di bawah jambatan

Manunggu laki di muka lawang

Barasihi lingkungan wan parumahan

Supaya nyamuk kada basarang

AIDS

Anak bakantan di atas rakit

Singgah bataduh di bawah jambatan

Mun kada handak AIDS manjangkit

 

Jaga pargaulan tingkatakan ketakwaan

Bingka barandam apam wan lakatan

Dimakan pas malam pangantenan

Jangan rancak baganti pasangan

 

Cagah AIDS nang mamatikan

Batis badarah tajajak karikil

Obat habang nang jadi kasainya

Jangan mamakai jarum nang kada steril

Amun kena AIDS kadada obatnya

 

Tulak bajalan ka Pakauman

Saban baisukan di hari kamis

Amun awak panas labih sabulan

Itu tandanya kena panyakit AIDS

Dwi Wahyuniarti dan Mariana Ramadhani – Mahasisiwi FKIP Unlam Banjarmasin PBSID 09)

« BUDAYA BANUA


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: